بقلم : نادية البسيونى
يا فانوس يا منور فى الساحة
الدنيا بنورك سواحة
لابسالك لبس الأفرنجى
لابسالك لبس الفلاحة
يا فانوس بالشمعة الفضية
داير فى الحارة الشرقية
داير فى الحارة الغربية
ربى يا فانوس رب النية
والدنيا تشبه للحلية
وكبيرها يا دوب حتة بلية
تدحرج بك ومعدِّية
يا فانوس يا مقبِّل ومبحر
حبك فى القلبِ بيتربع
والورد يمسى ويصبَّح
والبلبل فوق غصنه يسبَّح
ربك بيقسِّم ويوزع
والرزق الضيق يتوسع
لما من الفجر تقوم تسعى
دى الإيد البطالة ما تسوى
يا فانوس نورك بيطمنى
وانت بتتمرجح وتغنى
وعنينا بحسنك بتحلِّى
والكل بيفرح ويهنى
يا فانوس احمر واخضر واصفر
بابك متعشَّق ومضفَّر
وقزازك عمره ما يتعفَّر
لو حتى الريح فى الكون صفَّر
يا منور أبواب الأزهر
المدنة بتدَّن وتكبَّر
قوم صلِ يا مؤمن واتوضى
دى الدنيا ف ثانية بتتفضى
